2017年第一次跑游跑

呢兩晚都睡得不好,三丶四點已經醒左。今早也不例外,比賽前一晚十分緊張,加上唔知天氣會點,會唔會好似舊年咁取消。
一大早天未光就搭通宵巴士出去,太攰了連早餐都食唔落。點解咁緊張?皆因沒有好好凖備,平日有游水同練跑,但其實唔夠,游海同游池十分不同。我今年未游過海,比賽前又冇實地考察,連D「架生」都要搵返出來。


雖然出門口時有雷暴警告,到達後天色漸漸變好。一落車見到朋友,閒聊幾句就要開始準備了:攞號碼布、換衫、寫號碼、寄存、放野去轉項位。另外今次係跑先,亦要考慮泳帽、泳鏡怎樣處理。


蝦叔嗰場6:45am 開始,早過我差不多半小時。我在起跑線附近同朋友傾計,多得佢提點先知道今次條跑道較窄、游水每圈要上岸一次…..令我有心理準備。之後又遇到另一位前輩,分享佢由59歲開始接觸鐵人的經歷,好正面亦好inspiring。

7:15am就到我嗰早briefing,今次係跑2.5公里、游750米、再跑2.5公里。每次比賽的流程都不一樣,跑去邊、跑幾多圈、游水順時針定逆時針游、駛唔駛上岸、轉項位係邊等等。所以一定要留心記住。

7:25am 嗶一聲就開始跑了,跑步一向不太好的我只能按心跳、狀態,希望去游水先追上。今次仲大鑊,我唔記得set手錶,看不到pacing也看不到heart rate,只能靠自己感覺去。一開始已經落後,同自己講唔好緊張,做好轉項,落水放鬆一下先。



太耐冇游海,一開始有少少迷惘,本來想試用自由式,但最後還是用蛙式,望住目標游。心跳好快,腳指有少少抽筋,不停同自己講調整節奏,望住D橙色波,唔好游錯。第一圈完,上水時有點腳軟,「頂多個圈!」


搞好個鏡又走落水。今個圈感覺好了,一來附近少D人,二來自游順左。上岸時有點意外,跌左嗰鏡又執唔到😭😭😭。


好好彩有個好心人幫我執番,十分感謝佢😘。之後進入直路,開始跑最後2.5公里了。唔知係咪瞓得差,加上烈陽,身體已經十分疲累,「捱埋呢十零分鐘啦!」我心想出力走,但腳冇力,好似7分披一樣。


見到迎面一些參賽者都努力不懈,i m not alone,我也要堅持到底,連經過水站也不敢停下來,腦海中只有自己在運動場衝800米的景象。終於衝缐了!已經忘記了自己個面口,反而要將號碼布掹番去前面作記錄😂

過左終點第一個見到不是蝦叔,而係同我傾左好耐嘅一個新朋友。如果不是佢提醒,我一定會出錯更多。

水陸兩項不單是跑步同游水,其實仲有好多要準備,例如心理、肌力。加上游海,要格外小心,這也是每次我也會提醒自己的事。收到成績單,一個驚喜,第一圈跑步竟然快左咁多,整體成績也進步了。

大家有興趣可以上三鐵總會看看

https://www.facebook.com/Hong-Kong-Triathlon-Association-61510981856/

廣告

因跑步而常用的Apps

見到呢個題目,唔好以為我會推薦跑步記錄apps咁行,相信大家可能仲熟過我,乜嘢 Relive 我仲未識用。反而我想介紹一下因為跑步Keep fit 而開始愛用的apps。
1)健康類: MyFitnessPal


呢個係減肥必用工具!第一,佢可以記錄你的日常生活飲食習慣,好多野食都可以搵到佢卡路里同成份。好多時睇完後都唔敢食。不過要健康就要注意飲食,今餐食多左就下餐減少啦。
除了intake,佢亦同好多運動apps/智慧型運動手環互通,自動將每日的運動狀態及所消耗的卡路里數據同步整合在一起,總結每日的吸收與消耗,數據化令你看得更加清楚。除了能夠有助於減重瘦身,更有助於維持身體健康、保持營養均衡。

另外亦有磅數記錄,加上上載相片功能,可以每日監察自己進度,無論在數字同外型上。

2)健身類: 7-Minute workout

有不同部位訓練,亦有video示範同計時。仲有可以解封(unlock)不同部位訓練,又有每日提醒。根本沒有藉口話「冇時間」同「唔識做」。係屋企、去旅行在酒店內都可以抽時間鍛練。

3) 修圖類:Snapseed

而家興做完運動影相放facebook,所以修圖app十分重要,可以令D相冇咁悶。近來最常用Snapseed,"Drama"效果令到拍出來的相顏色反差更大,D相頓時變得有型好多。好多人問點様將Garmin嗰圈圈數據放上張相上,就係用佢double exposure嗰功能,十分user friendly。

4)拍片類: Quik

之前係臉書有好多XX challenge,好多時都要拍下video。如果唔想咁單調,想有D音效同間場,呢個app幫到手,最重要係容易用。

另外天馬行空咁想想,有乜野功能嘅apps大家想跑步時有?

* 打氣app: 當你處身烈陽下好想切碎時,就會有把聲音同你講「繼續呀」「千祈唔好停」。

* 警報器: 當你自私跑時遇到危險,可以按個制就報到警。

* 拍照指導功能:以後唔駛叫朋友/老公/老婆影,亦不需為影成點而爭拗。個app指示用什麼pose、什麼角度去自拍,自己搞掂。

其實跑步時都唔會玩手機,呢D apps 都係為運動增加一點樂趣同推動力,效果如何最後也是靠自律。