回頭率極高的美式美睫

之前聽說過植睫毛,一來怕污糟,二來自己成日做運動出汗,又怕整完好誇張,一直都冇去試。上個月同朋友傾開呢個話題,解決咗我嘅疑問,仲介紹我去 XtremeLashes,一間美式美睫專門店。上星期我就懷著緊張又期待的心情去試。

1. 問卷調查+睇片

一去到唔係介紹產品,而係了解你平時生活習慣,以選擇最合適的產品。原來做睫毛都咁多考慮:

* 平時會唔會戴眼鏡(長度選擇)

* 運動習慣 (睫毛生長速度)

* 瞓覺姿勢 (睫毛可能會側向一邊)

* 有沒有做過果酸、laser 等美容療程、皮膚過敏等

2. 長度 x 弧度 x 款式

第一時間一定係想到做幾長先靚,但其實點様排列、密集程度、弧度也很重要。同時也要考慮眼型、本身睫毛粗幼,先可以選擇出靚靚而又襟用的睫毛。而店內所用的是「X」形的睫毛,較一般市面上圓形的更輕更貼。

3. 沉睡的90分鐘

做之前先在眼袋位置貼上眼膜,之後美容師就拍照記錄,整理一下工具就開始了。全程閉著眼,沒有什麼感覺(基本上我是睡著了),只係每隔十多分鐘有陣涼意,是美容師用風扇仔吹乾膠水。

不知不覺間就完成了,原來真係幾自然,可以減少化眼嘅時間。做運動素顏都可以好精神!

4.怎樣保養?

做完當然想keep得耐D、靚D,只要小心少少就可以。避開所有油性產品,例如卸妝油;用潔膚水洗面,輕力印乾,再用掃仔輕輕整理,千祈唔好大力摔眼! 呢幾天我化妝、做運動都沒有問題,唔見有「甩毛」情況。如果保護好,可以維持三至四星期的。

睇完係咪心郁郁呢💓💓💓

有興趣可以參考公司網站👇🏽👇🏽

http://www.xtremelashes.com.hk/

Facebook: https://m.facebook.com/xtremelasheshongkong/

‼️由蝦嫂介紹可免費補睫毛一次 (價值$500)

廣告

跑步女生都應做的五件事

(5 JUNE 2017)

我同好多人一樣一跑就好似上癮般,不能自拔,「唔開心要跑,開心又要跑」。平時注重練習內容、速度、去邊跑,但往往忽略咗一些細節,特別係女生,有好多野要特別注意!

1)記錄週期
「女人,一定要了解自己」一直有習慣記下每月的那幾天,通常經期的前一週會跑得特別吃力,呼吸較促。之前睇書話因為黃體酮分泌。我就會水腫,成個人變得好重,呢D情況因人而異。現在可以用App記錄,更可以預測下一次日子,十分方便,有比賽更可以有心理同生理準備。

我除了留意日子,也要留意每次流量。記得初初跑步,流量突然減少,日子也縮短了,嚇死了。隨後調整運動強度同飲食,加上中醫調理就好了。呢D可能係過度運動反應,也可能係營養不足、脂肪太低等,要留意一下。

2)路線日程 不可固定
「安全、安全、安全」為咗安全,特別是女性,我通常唔會跑同一條路,有時候同人跑有時候自己跑,有時早、有時晚。也不要將路線貼上facebook同IG。出門前一定留下訊息俾家人/朋友去邊到跑同大約幾點返。

IMG_7334

3) 防範跟蹤
有時候在街上自己跑,可能會遇上無聊人莫名其妙的口頭騷擾。遇到這種情況,一定扮睇唔到、聽唔到,同跑去人多的地方,之後也要注意附近,看看有沒有被跟蹤。雖然聽歌可以減少呢種情況,但街跑聽歌有一定風險,可能會忽略路面情況,例如有車都唔知,要多加注意。

4) 檢查衣著
Bra top:一定要夠承托力,要試穿同留意有無凸點、走光情況。千其唔好著普通內衣!
短褲:褲頭要夠緊,最好有兩層,可以防止走光

5)厲行潔膚
我每天都化妝,好多時跑步也會。跑步毛孔擴張,化妝會令到皮膚透唔到氣,皮膚會變差。我自己就可能習慣了跑完返屋企一定切底清㓗好,反而跑左步後皮膚好左,冇左粒粒同膚色好左。卸妝真係好重要!就算只係有防曬都要切底清潔。

IMG_7338.JPG

新春冷鬥小馬——2018關西機場泉州馬拉松後記

上年九月北海道之旅完結,在機場候機時在JTB Sports看到泉州馬報名開放,正在農歷新年假期,上網搜尋又冇乜人提過,「唔覺意」就按報名參加,來過快閃之旅。

關西機場泉州國際機場馬拉松之所以不出名,主要因為限時五小時、賽道係條大直路、沒有特色補給、沒有完賽獎牌。時限對我來說是有點壓力,參加是抱著好奇和挑戰心態。

馬拉松起點在浜寺公園,距離機場少於一小時車程,起步時間較晚(早上10:30),所以我選擇住臨空城(Rinku Town),即關西大型outlet附近,交通方便之餘又可以購物,洒店房價錢亦相宜。

(左上:零晨到達,由於沒有JR,只好坐的士到酒店,約港幣250;右上:酒店在Premium Outlet對面;除了購物外,連接outlet、在摩天輪附近Seacle亦有大浴場和按摩中心。下:酒店隔離就係中央公園和棒球場,賽前可以熟習一下天氣環境)

這類細賽沒有大型的expo,報到處位於起點,可以於賽事前一天或賽事當日報到。可能因為賽事結束後有特產展,所以規模亦較之前網走的更大型。對海外跑手亦有特別招待,除了設有海外跑手報到處外,亦將海外跑手安排到A區。今年只有約100名海外跑手,流程十分順利,其實賽事當日取也有充足時間。

(圖:賽前一天到報到處取號碼布及紀念Tee)

另外,賽事前一晚在機場酒店設有開幕晩宴,邀請參賽者及同行家人朋友參加。難得來到我就去看看,活動包括介紹主辦團隊及嘉賓、宣誓和祝酒,之後就是自助晚餐,十分豐富,我亦認識到來自台灣的一家四口,亦見到女神歐陽靖,原來她是今年的特邀嘉賓。

(圖:好熱鬧的晚宴,雖然我不懂日語,但也感受到那種團結和熱血)

這個月日本氣温很冷,好多地方下大雪,泉州天氣亦只有一至兩度。比賽早上吃過飯團就孤身上路,在JR內認識了幾位日本朋友,他們剛剛跑了姬路城,當日特地去泉州作應援團。其中一位略懂英語的女仕十分熱情,送上暖包,又記下我的號碼,說會幫我打氣。其實他們的朋友大多是三個小時多內的跑手,沒有預料會見到他們的應援。

熱身、寄存行李後就往起跑點,10:25十公里組首先出發(時限只有1小時),之後10:30就到我了,不知不覺間就起跑。一早看過賽路介紹,大直路一條,由於不准變裝,沒有什麼奇裝異服,由於跑市區,沿路也有市民打氣,人不算多但沒有間斷,還看到幾位醫療跑手。由於天氣乾,跑到差不多6公里已經想飲水,但跑來跑去也不見水站,直到10公里多才見到第一個水站,心想「最衰自己冇check,之後點算」。

(圖:關門時間及補給處)

前半馬用上2小時11分,時間不算差,但狀態跟以往不一樣,身體已經開冇力,加上右腿有點痛,開始擔心捱不下去。落得場就盡力吧,每公里在倒數中,走得一公里就少一公里。直到32公里處見到大橋,最後一包gel已經吃了,體力差不多耗盡,開始跑下行下。

最後10公里,要上兩條魔鬼橋了!加上看到隔離缐的收容車,感覺十分遙遠。絕望、失望之際,突然聽到有人叫「Stephanie-san」,原來是他們,在JR遇到的日本人為我打氣。之後半行半跑,食下柑,飲咗啖可樂,慢慢地返回終點,臨到終點時,又聽到自己名字,原來他們在終點等我。另一個意外驚喜是今年有完成牌,和其他日本賽事一樣,有工作人員為你戴上。隨即被一家電視台/主辦單位拉咗去訪問,不懂日語的我只好講幾句英語道謝。

(圖:日本朋友用應援App為我打氣,也替我拍下照片)

(位於34公里處的魔鬼橋「田尻天空橋」:圖片來源:KIX 泉州國際馬拉松賽官網)

由於天氣太冷,我沒有逗留太耐,就離開往JR去,好好彩見到一間coffee shop,叫杯熱咖啡令身體暖些。冷靜下來看看照片,眼涙就開始流,想到自己呢段時間的付出、身邊人的支持和忍耐、以至泙水相逢的人的關顧,想到蝦叔有一天我發脾氣後說:「我點會唔明白你?所以我每晚聽到你咳都冇話你知,亦冇阻你出去」,謝謝你們。

關西機場泉州國際馬拉松

* 舉辦日期:每年二月

* 全程馬拉松限時:5小時 (7個關閘)

* 另設10公里組,限時1小時 (5.9公里關閘處:32分鐘)

* 有完賽毛巾和紀念Tee,今年第一年有完賽牌

* 近關西機場,適合快閃/連馬之旅

* 可以入住機場洒店/ 臨空城 (Premium Outlet) 附近酒店牌

* 報名方法:https://jtbsports.jp/en/

明明很喜歡,但總是下不了決心去跑步

同一個日日夜夜睇書講書的人一齊生活,係有可能令一個厭惡書本嘅我都開始睇下書。近來,我睇左啲關於「拖延症」嘅書。

呢個topic歷久不衰,證明左呢樣野係好多人既共同問題。想做好多野,但到頭來有幾多件我地做得成?記得某銀行曾經有個廣告片主題係「拖延博物館」,入面有咩展品?包括好多寫左個開頭既小說,好多張交左年費但只係用過三兩次既健身卡。不妨搵黎睇下,保證中鎗(搜尋Hotel of Procasination就可以看到)。

不期然諗到自己,成日口口聲聲話好熱愛跑步,但總係有時會畀藉口自己唔去跑?就算跑壇高人,都講過其實好多練習都係不情不願咁去。換轉係意志比較薄弱既一般跑者,更容易就會將當初訂立既跑步計畫一拖再拖,最後都係得個講字。

想想,為甚麼會找藉口不去跑步?

天氣啊!

好似上星期咁凍,點跑呀!怕熱怕凍怕辛苦,呢個係最典型的拖延理由。天氣永遠有得賴,無數藉口安慰我地「下次下次,下次大概可以……」。

跑得慢!

「我點勤力都冇可能BQ/ sub-3架啦。」有人覺得目標太遙遠,完全冇辦法見到終點,覺得跑來都嘥氣,不如安安樂樂唔跑咁多。

怕輸!

但有啲勤力的跑者,都會有倦勤心態。失敗與成功,對於高要求的跑者來講都會成為害怕,繼而拖延的理由。「上星期10隻400,我全部跑到目標時間之內。今個星期狀態好似唔係咁好,不如下星期先去。」有人害怕失敗,希望用拖延保持「完美」紀錄。再簡單講,就係怕失敗而著草心態。

點解折磨自己?

再大不了,可以出絕招——興趣啫,賣命咩,使唔使咁搏?

講到咁,當然冇人阻止到你。但如果真係想減少跑步上的拖延,又有冇辧法?我唔知大家,我自己就覺得心態上可以有啲調整。

1. 認清自己拖延原因:有冇細心諗過自己在咩情況下最容易有藉口?一定要找出「病源」先可以對症下藥。

2. 不做的後果:好似陳彥博咁講:「想放棄的時候,想想是甚麼讓你堅持到這裡。」好多人講「毋忘初衷」,大概就係咁樣。想想如果你再拖下去,再不做的話,跟你的「初衷」有違背嗎?又或者自己怕會肥、怕慢、怕要重新嚟過!

3. 將目標切細:sub 3係難,BQ係難,咁大project好易令人消化不良。有冇諗過將呢啲目標變成每月、每周,甚至每日的具體練習項目?然後循序漸進去完成。

4. 間中放假:當自己堅持完成到幾日之後,不妨「放下假」,做做其他事情。甚至有人規定每周有某天一定「不能跑步」,巧妙利用人性抵抗心理,使自己變得「餓跑」,增加跑步動機。

老套講句,世上無難事,只怕有心人。有冇諗過,如果你跑步方面若然擊敗到拖延症,又有可能令你建立起信心,在工作及人生其他方面,都有力去完成計劃實踐夢想?

跑步好物小故事

早前接觸到《日日100》呢本書,一看便愛上。作者能夠將日常生活上毫不起眼的用品影同寫得好有感情,令我想起自己身邊關於跑步的物品,同埋當中的故事。今次挑選的物品比較特別,唔係一般當然我唔想講平日成日寫的衫褲鞋襪、手錶、防曬等跑步必需品)。

節拍器(拍子機)

對於我呢位音樂白痴,拍子機係放係鋼琴上面,有支針左右擺動嗰隻。直到教練買了一部給我,先知有手提版。跟了教練差不多一年,之前成日笑我雞仔步,後來大步又拉親,進進退退。雖然我不算出色,但沒有放棄我,叫我用拍子機改善步頻,從而調整姿勢。有一段時間自修、長課也拿著它,滴答滴答,雖然有點催眠,但每次想到教練沒有放棄我時,我就會死死地氣繼續。雖然有好多手機apps有打拍子功能,但見到呢件小物就會覺得好鼓勵,真的要珍惜呢段關係。

貼貼

記得初馬前三、四個月,走interval時不慎拉傷大腿內側,睇醫生、食止痛藥、針灸都只有少少改善。蝦叔從朋友口中得知這種貼,於是就買給我試。一開始見到咁細塊又冇彈性,仲咁貴,都好懷疑。貼上之後跑又好似真係冇咁痛,最後我也順利無痛地完成初馬。唔知心理作用定真係有效(官方說:「促進人體血液循環,消減水腫,從而舒緩疼痛及不適之感。」,隨後的馬拉松我也會貼上,賽後恢復也會貼,就好似我的護身符一樣,也提醒自己盡力之餘也要愛惜身體,長跑長有。

小袋子

25蚊100個?在深水埗入手的小袋,本來是用來收藏完賽獎牌,後來卻用來收起旅行後的散纸;另外長課時八達通、錢都靠佢,防水又輕身,有時候甚至要用的電解丸也可以放進去。每用一個都別具意義,代表一次旅程完結,把美好回憶好好儲起。

最後不得不提就係呢對鞋。一開始已經說過不想寫太普通的跑步用品,但呢對卻意義重大。雖然小狗已經離開我幾年,間中也會掛念或夢到。可能有見及此,蝦叔訂了這對「陪著你走」嘅虎走送俾我。每次著住佢走運動場也覺得多一份溫暖,就算自己跑也不覺孤單。

你又返大陸——無錫跑玩之旅

有幸收到邀請,所以早前到了無錫馬拉松的新聞發佈會。逗留幾日,有玩有跑。如果大家2018年有興趣參加無錫馬,不妨睇睇呢篇。

跑步好去處 1 – 環蠡湖

蝦叔話個湖同范蠡、西施有關。哈,其實我連個「蠡」字廣東話係讀「禮」都唔知。無論如何,果度風景其實也很美。今次住的飯店正正在附近,約跑1公里便到達。沿湖跑一圈大概9公里,今次就跑兩圈當長課。沿途大部分是單車路和行人路,但亦有部分路段要在車路跑,必須注意安全。呢度亦都係出年無錫馬拉松的其中一段路缐。

跑步好去處 2 – 沿河跑

梁溪河是一條歷史悠久的河道,沿途都是亭台樓閣、小橋流水,也有「全民健身道」。一來一回約8公里。途中遇到好多晨運市民,晨跑都好安全。

除了跑步以外,無錫也有不少景點。例如:

1. 有千年歷史的南襌寺;

2. 錢鍾書故居、著名書店「鍾書閣」;

3. 「家事國事天下事,事事關心」的東林書院等。

(亦都所以有人講左好多文學同歷史……)

乘高鐵到蘇州,只需十五分鐘,我地都有順道一遊。蘇州最著名當然是「中國四大名園」之一的「拙政園」。暫時中國唯一一間的誠品書店,都係開在蘇州,𥚃面亦有很多特色食店。當晚我地去左素食餐館「大蔬無界」,去到先知係米芝蓮一星餐廳,而菜式亦果然係精緻而味美。

由香港到無錫直航機只需約兩小時,而市內交通亦很方便,兩個人搭的士也很化算和方便。

2018無錫馬拉松在春天舉行,相信到時會有櫻花睇。但由於係雨季,大家都要做好迎接雨戰的心理準備。

賽事於2018年3月25日舉行,有興趣的跑友可看官網 :

http://wuximarathon.com

報名時間:2017年12月23日10:00 – 2018年1月8日22:00

為跑者而跑,就當一次兔子!

自從上年新加坡日落馬6小時痛苦經歷後,我已經同自己講唔會再去通宵熱馬。世事無絕對,突然有個機會俾我當「兔子」(配速員),於是便參加了馬來西亞的一個馬拉松。

雖然不用「造成績」,但在上次水土不服嘅陰影下,和前幾星期拉傷了後大腿,一直都好擔心表現。不過既然答應了,便要盡力做好。

比賽在凌晨2時起步,事前只吃最熟悉的意粉跟三文治,睡了三、四個小時就出發了。我地係要在5小時內完成全程馬拉松,即係約7分披 (7分鐘/公里)。除了我和蝦叔外,仲有一位當地的配速員,大家掛上氣球和發光手環就戰戰兢兢去起步區。

配速員未必要跑得快,但一定要跑出穩定速度。一開始我用6分半至6分尾的配速走,期間仲俾蝦叔駡點解跑咁快。我的想法是頭半程跑快少少,一來唔知距離準不準確,也怕後半程大家也會少少「跌速」。頭半程算是順利,大部分係大直路,有十多個朋友跟著,比我們的半程時限快四分鐘左右。

不過在高興之際,也感到自己體力開始下降 (要捱通宵加上流太多汗),二來我發現部分跑友已經跟不上。由於配速員另一責任是照顧跑者,眼見下半程路段較凹凸不平,自己除左繼續跑,也揮手示意;同時也注意周遭環境,觀察跑者在場上的需求。

這對於我,也是一大突破。平日喜歡自私跑,只看自己,好少留意其他人。當時就算攰,也只好不斷提醒自己要冷靜,留意地面、自己心率和狀態。

差不多30公里位,仍然比預算時間早少少。來到最後一段路,大家心理狀態與體能都到了臨界點,包括我和蝦叔。 亦開始見到有人行、有人停下腳步。仲有個半小時,眼見大家sub-5有望,身為配速員就唔可以就咁自己跑,使出不同的招數,幫助跑者堅持下去。例如說聲「加油」,又或者當騙子說「就快到終點了」。

有的跑友說我們走快了許多,其實我們也無法判斷。只因里數牌不是每K都有,我們大部分時間只能靠手錶GPS知道里數。未到終點,始終不知道手錶GPS跟大會計算有多大誤差。有見及此,情願跑尸快少少。

去到最後5公里,點解好似得我同幾位跑手跑緊,蝦叔不見了,我估佢開始跌速。今次唔同自己去比賽,今次有責任帶參加者在時間內返終點,我只好自己繼續。在內心掙扎和擔心的時候,佢又走番上來,可以鬆口氣。

最後仲有兩公里時,大約仲有二十分鐘,有跑友說可能「唔足數」,前面轉個彎就是終點,示意我們可以跑慢點了。但我唔係好信,因為我望不見終點站,萬一最後反多一公里,就不能達到5個小時目標,辜負了之前的努力。

結果轉完一個彎又另一個彎又一條直路,終於望到約二、三百米外就是終點了!仲有約7分鐘,今次真的可以放鬆心情和腳步。最後完成時間為4小時56分,第一次表現尚算滿意,唯獨是不太習慣邊跑邊對話,有些時候也按耐不住「黑面」起來。

今次這個挑戰有點艱苦,但看到跑友的留言卻十分感動,比自己PB更有滿足感。感謝這個機會,又上了一課。

遇見你們,是我最美麗的意外

跑步之後,認識的人多了。以下這些,令我感激,值得好好記錄吓。

一、我的教練

第一時間想到的當然就是我的教練(雖然佢永遠唔認自己係教練)。認識只有一年多,感覺不止是一個教跑步的人,而是一位可以分享生活經驗的長輩。感謝佢嘅包容,面對一個進步慢、情緒化、衝完interval成日黑面、比賽前永遠唔會俾號碼佢live track的學生🤣。不過認真的,如果沒有佢照顧,我應該早已放棄練習,hea跑就會囉。

二、跑步作者

另外就係一批以寫跑步文章的作者,例如陳兄、水哥、RTW、跑玩日本……(計埋某叔啦下),他們有些是知識型,令我看到世界不同的跑步故事、新聞,吸引左我去看書和相關電影;有些是抒情型,寫出令我感同身受的片段;有些記錄型,將跑者嘅故事、經驗集結起來。多得呢班作者的貢獻,令我對跑步世界認識多咗。

三、新知舊雨

多得網絡,令跑步變得不再孤獨。呢段日子認識左好多跑友。跑友間不同嘅性格背景,令我對社會認識多咗。佢地好多都對我呢位新相識非常關心愛護!除了多謝,也是多謝。

四、偶遇的您

很多人都說,跑步時是在跟自己的心靈對話。但去到比賽時,就會有一群素未謀面的人,在路上幫別人加油,也有旁邊或迎面而來的跑者,互相打氣。一個眼神、一句加油,比賽頓時變成不是個人戰,而是一場團體戰。

還有在無數比賽中服務的義工、攝影師、急救人員等。沒有您們,跑者就沒有順暢的服務、動人的照片及安全的賽事。

常常都說「跑步,遇見更好的自己!」但我更覺得,跑步也令我見識到很多人性的美善。謝謝各位令我的長跑道路變得更加精采。

跑進將棋之鄉——天童

幾個月前收到天童市邀請去參加半馬,第一時間就check下邊度,原來是日本東北山形縣的一個市。好多年前去過東北旅行,感覺全是景、景、同埋景,有點鄉下同悶悶地。搜尋到的是梨、將棋等,好似好悶……

人大左,加上愛上旅跑,睇世界的眼光同以前唔同晒,今次竟然比我想像中更開心。天童以至周邊地方,都有不少美食、温泉、同埋好多跑步好去處!

跑:舞鶴公園 (天童公園)

介紹得就唔會係街跑咁普通,雖然天童市本身唔算好大,但市內有舞鶴公園,隔離係舞鶴山,距離天童JR站約1公里。由於前一天跑完半馬,體力未能回復,所以就無圍著個山跑一圈,只在公園跑了少少,再往山上去看看。沿途風景優美,咁啱秋天,勁多紅、黃葉🍁🍁🍁。之後就見到一大塊平地,是人間將棋棋盤,從旅遊局網頁上看到,每年四月都有活動,加上櫻花盛開,好壯觀,同時亦可從山上眺望整個城市。

http://www.city.tendo.yamagata.jp/tourism/kanko/maizuruyama.html

天童盛產將棋,當地人亦都好流行捉將棋。天童站樓下有將棋研究所,書局甚至超市都有各類型將棋的書籍雜誌賣。所以呢度既賽事有跑手cosplay將棋都係好自然嘅事了。

遊:廣重美術館

天童係較為樸素的鄉下地方,唔好預期會好多姿多采,但咁就正可以令你感受到一份難得的靜美。市內可以逛逛博物館、美術館。我地去咗酒店附近的廣重美術館,兩層樓高,收費每人600yen,𥚃面主要展出浮世繪,我就唔識呀,反而去左二樓的圖書角看看。

館內也有一處特別的角落,給遊覽者畫公仔貼在紙杯,累積下去就會漸成為紙球。我們見到有參加完天童半馬的跑友留下作品,紙杯內畫有「完走」字樣!

住:滝之湯 (溫泉旅館)

一間可以整温泉蛋的酒店,地下大堂有將棋玩,亦有懷舊乒乓球,房間也很大。唯一比較差的是晚餐,我地額外訂的,大約每人700元,味道普通。

仲有……山形市的霞城公園

山形市離天童市約十五公里,坐JR只係20分鐘車程,不過真係要check JR時間表,班次疏到一個點,車程20分鐘,但等就可能要個幾鐘。JR站有shopping mall S-PAL,有食肆,比較集中。而離JR站約十分鐘路程就係霞城公園,正值秋季,放眼望去一大片紅黃色的大地,完全係跑步好地方。我估如果四月櫻花季會仲靚。

旅遊的意義

前兩天聽到一個電台節目討論旅遊的意義,講到而家「出走」方便咗好多,成本亦低咗,好多時去個short trip 「治療」自己。我都好有同感,近幾次去跑步同旅行,有人問點解咁辛苦,都唔relax。各有所好,我覺得去跑下好療癒,而去一D少人嘅地方更好。近幾次去日本,都去咗D相對冷門地方,好清靜。當然,交通就冇咁方便,亦都冇咁聲色俱全啦。

再次感謝天童市負責人接待,絕對是一次很難得的交流機會,衷心希望有機會再到訪這個美麗的小城。

天童LaFrance半馬官網

http://www.lafrance-marathon.com/

天童市觀光物產協會

http://sp.bussan-tendo.gr.jp/

Excuse Us – 總有不動的藉口

我好少叫人跑步(或者做運動),反而常常會有朋友/收到網友PM話想開始,之後又會好多「但係xyz」。我明白每個人都會有魔鬼,我自己也常常遇到,例如琴日放工,腳重重,又有點眼訓,心想「不如休息一下⋯⋯」。但一次咁、兩次又係咁,就會變得好隨意,久而久之就會放棄。所以自己想改變就要搵方法去打走D「藉口」。

1)「沒有時間」

香港人普遍都好忙,工作、家庭、進修等,時間真係要唧出嚟先有。但試想想每日嘅時間表,除了工作、交通、家庭外,總會有一些時間做其他野,例如上網、煲劇。當然人冇可能無時無刻都做正經事,要輕鬆一下。但如果你真心覺得要開始運動,試下唔好夜瞓,早D起身跑,又或者每星期減少一次飯局,俾D私人時間自己去郁下。如果沒有健康身體,咁又點可以應付繁重工作,亦冇力陪小朋友周圍走。 “Life is short, Running makes it seem longer” 、「做時間的主人,不做時間的奴隸」

2)「放工好攰」

除非你份工要周圍走、運動量大,否則攰嘅感覺係精神上、心理上的。我也是上班族,放工後得番半條人命。但只要克服了「著鞋」嗰一刻,跑完會更加爽。我盡量跑之前1小時食少少野(例如生果、蛋),返到屋企就換衫走,千其唔好坐或者「攤一陣」,好難會起身㗎!

“The hardest part about running is always going to be getting out the door.”

3) 「跑步好悶」

我承認初初跑步真係好悶,特別係我呢D鍾意在室內活動,在跑步機上簡直挑戰我的忍耐力。你可以試試街跑,找些新路線;亦可以邊跑邊聽歌/ Audio book,當然唔好太大聲,要注意安全。

4) 「跑到好傷」

好多人一直少運動,一開始跑就會氣喘,之後身體各部位也痛,最常見嘅係側腹痛 (side stitch);另外最常聽到的就是膝頭痛。

首先要清楚了解自己身體狀況,例如之前有冇整親,如果沒有什麼大問題,感覺痛係因為沒有足夠熱身同跑嘅速度太快,身體未能適應。試試調整呼吸和速度,再慢慢開始,終有一天會適應的。

5) 「今日好熱/ 落雨/ 好凍……」

在香港生活,已經開始習慣左熱同落雨,要比賽、要練習,其中一項挑戰就係要適應天氣。天氣常常不似預期,也不一定就你。所以在安全情況下,唔好讓天氣成爲你嘅藉口。

講到底,冇人可以迫你去改變,開始看緣份,堅持是靠自律。不要空想,即刻行動!

以下網頁有365個唔跑嘅理由,你係咪每日都中?

http://365excusesnottorun.tumblr.com/